• 1 Maoni
• Chapisha
• Baruapepe
• Tweet
• Panga upya

Milipuko miwili ya mabomu yanayodaiwa kutegwa na al-Shabaab yaliua si chini ya watu wanane katika miji ya Dhusamareb na Mogadishu hapo Jumanne (tarehe 1 Mei), liliripoti Shirika la Habari la AFP.

“Yalikuwa mashambulizi dhidi ya adui,” al-Shabaab ilisema katika taarifa yake iliyotuma mtandaoni.

Huko Dhusamareb, wabunge walikuwa wakikutana na wananchi katika mkahawa kujadiliana namna ya kuweka uongozi wa eneo hilo pale mtu mmoja alipoingia na kujilipua mwenyewe. Raia wanne na wabunge wawili waliuawa katika mkasa huo na wabunge wengine wawili ni miongoni mwa waliojeruhiwa.

“Mlipuko ulitokea kwenye hoteli mjini na kuwaua watu kadhaa, wengi zaidi wamejeruhiwa,” alisema kamanda mwandamizi wa wanamgambo Ahlu Sunna wal Jamaa, Mohamed Abudlahi Moalim.

Na huko mjini Mogadishu, watu wawili walikufa baada ya mabomu kulipuka kwenye gari iliyokuwa ikitokea makutano ya barabara ya K4 kuelekea uwanja wa ndege, kwa mujibu wa polisi na mashahidi.

“Hatujui ikiwa watu hao walikuwa wanahusika na mabomu hayo au yalipenyezwa kwenye gari yao bila wao kujua,” alisema afisa wa polisi wa Somalia, Mohamed Said Bare. “Gari haikuharibiwa yote, lakini inaonekana bomu liliwekwa mahali chini ya viti.”

Siku ya Jumatano, Serikali ya Mpito ya Shirikisho ya Somalia iliyalaani mashambulizi ya al-Shabaab dhidi ya raia na wabunge ikiwaita wabunge waliouawa kwenye milipuko hiyo kama “watetezi muhimu wa amani ambao waliwatumikia watu wa Somalia na kuonesha uaminifu wao kwa utumishi wa umma”.

Waziri wa Habari, Posta na Mawasiliano, Abdulkadir Hussein Mohamed, alituma rambirambi zake kwa familia za waliopoteza maisha yao na kuwatakia majeruhi siha ya haraka.

“Tuliwashinda al-Qaeda kwenye uwanja wa mapambano na kudhibiti uwezo wao wa kufanya mashambulizi,” alisema. “Hata hivyo, sasa wamejielekeza kwenye mauaji ya mabomu ya kujitoa muhaga ambapo huwalenga raia wasio na hatia.”

Serikali ya Mpito ya Shirikisho ya Somalia imeapa kuendelea na kampeni yake dhidi ya ugaidi nchini kote. Mohamed aliwataka wananchi kushirikiana na vyombo vya usalama na “kubakia na hali ya tahadhari na kujikusanya kutunza usalama kwenye maeneo yao”.