• 2 Maoni
• Chapisha
• Baruapepe
• Tweet
• Panga upya

Watoto wa Mogadishu wanasherehekea Eid al-Fitr kwa furaha kubwa kwa mara ya kwanza baada ya al-Shabaab kuondoka jijini mwezi wa Agosti 2011.

"Baada ya kusubiri kwa miaka sita, sasa tunaweza nyuso za furaha na bashasha za watoto wetu wasio na hatia wakisherehekea Eid al-Fitr bila ya vurugu au mapambano ya umwagaji damu jijini," alisema Abdiqani Yusuf, mkaazi wa Mogadishu. "Vijana wa Somalia wanajiuguza madonda yao yaliyosababishwa na mijeledi ya magaidi wa kigeni na Wasomali watiifu kwa al-Qaida, wenye uchu wa mauaji na umwagaji damu."

Yusuf aliiambia Sabahi kuwa watoto wanatabasamu tena huku wakiaga ukatili wa al-Shabaab.

Magaidi ni maadui wa watu wetu na nchi yetu na hakuna kikomo cha ukatili na uhalifu wao," Yusuf alisema.

Taysir Jama Abdulqadir, baba wa watoto wanne, aliiambia Sabahi ya kuwa mwaka jana, watoto hawakuweza kutembelea fukweni, maeneo ya kucheza na sinema kwa sababu walikuwa katika hatari ya kukumbana na magari yaliyotegwa mabomu na vifaa vya milipuko vya kutengeneza haraka haraka.

Pia wakaazi wa Mogadishu hawakuweza kutembelea jamaa na marafiki zao walioko Balad, Afgoye, Beledweyne, Baidoa, Hudur na Garbaharey kwa sababu al-Shabaab wangewashambulia na mara nyengine kuwaua. Lakini tangu wakati huo, miji mikuu na midogo imekombolewa na vikosi vya Somalia na washirika wake.

"Huko nyuma, sherehe mjini Mogadishu zilikuwa ni jukwaa la maumivu na moshi ulijaa angani kutokana na mashambulizi ya kigaidi," Abdulqadir alisema. "Lakini sasa, mwanga wa matumaini unachomoza katika nyuso za wenyeji wanaojaribu kusahau wasiwasi, maumivu, dhulma, ugumu wa maisha, mateso na huzuni zilizokuwa zimewajaa."

Hoda Dahir, msichana mwenye umri wa miaka 13, alikuwa na hamasa ya kuvaa nguo zake mpya kwa ajili ya Eid.

"Ninahamu ya kutoka nje na kusherehekea siku kuu na bibi yangu anayeishi katika mji wa mwambao wa Marka," aliiambia Sabahi. "Bila ya shaka, sitasahau kwenda kupokea pesa kutoka kwa jamaa zangu siku hiyo."

Bashir Harid, mvulana mwenye umri wa miaka 12, aliiambia Sabahi kuwa anataka kucheza na marafiki zake na kutembelea nyumba za jamaa na marafiki wa familia ili kupokea zawadi za pesa za Eid na vitu vitamu.

Tafouti na siku za nyuma, mitaa ya Mogadishu, Afgoye na Balad ilikuwa uwanja wa vita vya kuigiza vinavyochezwa na watoto wakitumia silaha za plastiki za kuchezea. Watoto huenea mitaani na vichochoroni, wakilipua fataki wakati wa sherehe.

Kabla ya Eid, masoko makubwa mjini Mogadishu, ikiwa ni pamoja na yale ya Bakara, Hamar Weyne na Suuq Baad, yalijaa wanunuzi waliokuwa wanajitayarisha na Eid, kwa kununua nguo mpya, viatu na vitu vitamu.

Mudey Ibrahim Dhere, mfanya biashara ya nguo katika soko la Hamar Weyne, aliiambia Sabahi kuwa kuna mahitaji makubwa ya nguo za watoto wa umri wa miaka 3 na 15, ikiwa ni pamoja na mashati, jeans, suruali na kanzu. "Bei za bidhaa kutoka nje zimepanda," alisema.

Asubuhi ya siku ya Eid al-Fitr, washerehekeaji hupeana mikono na kumuomba Mungu msamaha na baraka zake. Watu huenda kwenye sala ya Eid, ambayo huanza baada ya jua kuchomoza.

Imam Hassan Fidow, mhutubu wa msikiti katika Wilaya ya Wardhigley, aliiambia Sabahi kuwa kupeana mikono ni mila ambayo wanaotakiana mema wa Somalia huamkiana na kukumbatiana wakati wa Eid.

Ni mila wakati wa Eid kuwakumbuka wale wenye shida, kama vile mayatima, watu wa ndani waliokimbia makazi yao na watu waliopatwa na athari za kukosekana kwa utulivu na njaa.

Raaliyo Sheikh Abdiaziz, mwanaharakati wa Jumuiya ya Kiraia mjini Mogadishu, aliiambia Sabahi kuwa baadhi ya watoto huomba pesa ili kuwapa watoto wenzao katika makambi za watu waliokimbia makazi yao mjini Mogadishu, ambao hawana chochote isipokuwa nguo kongwe, ili na wao wahisi uchangamfu wakati wa Eid na wawe na furaha.