• 6 Maoni
• Chapisha
• Baruapepe
• Tweet
• Panga upya

Serikali ya Tanzania imetangaza siku tatu za maombolezo baada ya meli iliyokuwa imebeba abiria 290 kuzama katika bahari yenye mawimbi makali siku ya Jumatano (tarehe 18 Julai) baada ya kuondoka Dar es Salaam ikielekea Zanzibar.

Boti ya MV Star Gates ilizama karibu na Kisiwa cha Chumbe kiasi cha saa 7:50 mchana, kwa mujibu wa Mwinyihaji Makame Mwadini, waziri wa dola katika ofisi ya rais na mwenyekiti wa Baraza la Mpinduzi la Serikali ya Mapinduzi ya Zanzibar.

"Tumepeleka waokoaji na boti tano katika eneo la tukio ili kusaidiana na waokoaji wengine," alisema. Jeshi la majini na Msalaba Mwekundu ni miongoni mwa waokoaji katika ajali hiyo.

Kwa mujibu wa orodha ya wasafiri, abiria 290 na mabaharia walikuwa katika boti hiyo, ikiwa ni pamoja na watoto 30 na baadhi ya watalii, AFP iliripoti.

Mpaka sasa miili 38 imeshaokolewa, wakati 114 bado hawaonekani, maafisa walisema.

Boti katika eneo hilo mara nyingi hubeba abiria zaidi ambao hawakuandikishwa katika orodha rasmi, kwa hivyo idadi ya watu waliokuwemo ndani -- na miili itakayohesabiwa hatimaye -- inaweza kuwa kubwa zaidi.

Rais wa Zanzibar Ali Mohamed Shein alisema siku tatu za maombolezo zitaanza Alhamisi, huku bendera zikipepea nusu mlingoti.

"Hili ni janga la taifa na ninatangaza siku tatu za maombolezo ili kuwafariji jamaa na marafiki wakati tunafanya kila linalowezekana kujua ukweli," Shein alisema katika mkutano na waandishi wa habari.

Naye Spika wa Bunge la Taifa Anna Makinda aliahirisha Bunge siku ya Alhamisi, ili kuwapa wabunge nafasi ya kushiriki katika msiba na shughuli za uokoaji.

Waziri wa Mambo ya Ndani Emmanuel Nchimbi aliomba mwongozo wa kusitisha kikao cha bunge kilichokuwa kinajadili bajeti ya wizara yake ili kutoa wakati kwa wabunge kutoka Zanzibar kuungana na familia zao.

Nchimbi aliiambia Sabahi kuwa alimpeleka Inspekta Jenerali wa Polisi Said Mwema kuimarisha shughuli za uokoaji huko Zanzibar.

Kaimu Katibu wa Bunge John Joel aliiambia Sabahi kuwa ofisi yake ilitoa ndege kutoka Dodoma kwenda Zanzibar kwa ajili ya wabunge wa Zanzibar.

Miili iliyookolewa itapelekwa katika Viwanja vya Maisara vya Zanzibar, ambako ilipelekwa miili mengine, wakati Spice Islander, iliyozama mwezi wa Septemba 2011, ambapo karibu watu 200 walifariki na kuacha mamia ya majeruhi. Zaidi ya watu 600 walinusurika katika ajali hiyo.

MV Star Gates ni meli ya pili inayomilikiwa na kampuni ya Sea Gull Sea Transport Ltd. kuzama, baada ya MV Fatih kuzama katika bandari ya Malindi huko Zanzibar mwezi Mei 2009, na kuua watu sita.

Jamaa wa abiria waliokuwa bado hawajaonekana walikusanyika katika bandari ya Dar es Salaam.

"Kama unavyoonana hapo, tumechanganyikiwa. Hatujaonyeshwa ofisi za meli ambako jamaa zetu walinunua tiketi, na wahusika hawatoi habari zozote na hatuna njia ya kufika kulikotokea tukio," Salum Ahmad Salum aliiambia Sabahi huku anatokwa machozi.

Waziri wa Nchi katika Ofisi ya Waziri Mkuu William Lukuvi alisema kuwa ofisi ya Mkuu wa Mkoa wa Dar es Salaam itatumika kama kituo cha kuwajulisha jamaa habari za abiria waliopotea na wakazi wengine wa jiji.

Aisha Mwinyikai Salum, aliyefika kutoka Zanzibar kwa boti siku ya Jumatano, aliiambia Sabahi kuwa bahari ilikuwa na mawimbi makubwa kutokana na upepo mkali, ambapo anafikiri kuwa hiyo ndio ilikuwa sababu ya ajali.

Msemaji wa polisi ya Zanzibar Mohamed Mhina alisema upepo ndio uliokuwa sababu. "Hali ya hewa ilikuwa mbaya sana," aliiambia AFP, na kuongeza kuwa hali hiyo ndiyo iliyosababisha shughili za operesheni kusimamishwa usiku.

Kawaida, kiasi cha boti 12 husafiri kutoka Dar es Salaam kwenda Zanzibar kila siku, kila moja ikifanya safari nne za urefu wa maili 39 za baharini.