• 3 Maoni
• Chapisha
• Baruapepe
• Tweet
• Panga upya

Wakazi wa Afgoye kwa mara nyingine tena wanafurahia utulivu wa mji wao baada ya vikosi vya Somalia na vikosi shirika kuwaondoa al-Shabaab mwezi uliopita.

Wakati wa kipindi cha miaka mitano ya al-Shabaab kuidhibiti Afgoye, wakazi waliishi katika hali duni na wakulima walikuwa katika shinikizo kubwa, linaloshuhudiwa na kudidimia kwa uzalishaji wa kilimo. Wakulima hawakuwa tayari kutoa nusu ya mazao yao kwa al-Shabaab kama “kodi”.

“Mji wetu ni mzuri kwani unaweza kuona mabwawa ya maji ya kuchimbwa, ndizi na miti ya maembe ya kijani muda wote inayoongeza zaidi uzuri na fahari ya sehemu hii ya kuvutia,” mkazi wa Afgoye Bakar Omar aliiambia Sabahi. “Tuna Mto Shabelle unaotiririka maji wakati wote, bila kusahau chemchem zilizotawanyika na hewa mwanana. Kila mahali unapokwenda, utaona pazuri na patulivu”.

Afgoye ni mji wa kihistoria ulio kilometa 30 Kaskazini Magharibi mwa mji mkuu. Kuna madaraja mawili ambayo yanawezesha uvukaji wa mto Shabelle, ambao unakatiza katikati ya mji na boti mbili za kutengenezwa kwa mbao zinazobeba abiria kutoka upande mmoja kwenda upande mwingine. Wakulima humwagilia mashamba yao kwa maji yanayotokana na vijito na msimu wa mvua.

Watu wanaoishi katika mji huu wanakadiriwa kuwa 250,000 na wakazi wake wengi wanafanya kazi za kilimo na uwindaji. Afgoye ni kituo muhimu cha biashara kwani upo kando kando ya barabara ya kuelekea Kismayo, Baidoa, Marka na Mogadishu.

Bille Ahmed Abdullahi, mfanyabiashara wa ndani ambaye amebobea katika uzalishaji wa malimao yaliyokaushwa, alisema Afgoye unajulikana kwa mazao mbalimbali, yakiwemo ndizi, maembe, limau, nyanya, machungwa machungu, kiazisukari, bamia na matango. Mji huu pia unajulikana kwa mbegu za ufuta zinazogandamizwa na mashine kutoa mafuta ya alizeti.

Wanakijiji wa ndani ambao wanategemea wanyama wafugwao kama vile ngamia, kondoo, ng’ombe na kuku wanawapatia wageni maziwa na mtindi kama ishara ya ukarimu, kwa mujibu wa desturi, alisema.

Serikali ya Somalia yaongeza msaada kwa Afgoye.

Kwa lengo la kuongeza uzalishaji wa kilimo, serikali ya Somalia inapanga kuwapa wakulima mbegu, mbolea na viuavidudu visivyo na kemikali, alisema Kamali Abdullahi Abdi Ahmed, Mkuu mpya wa Afgoye.

“Tunasaidia moyo wa ushirikiano kati ya [wakulima] ili kuwa na hisia ya jamii wakati wanapoadhimisha matukio ya furaha na mabaya ya kijamii na kuvuna mazao kama vile ngano na ufuta” Ahmed aliiambia Sabahi.

Rais wa Somalia Sheikh Sharif Sheikh Ahmed alikaa usiku kucha katika shamba huko Afgoye wiki iliyopita, wakati alipokutana na viongozi wa kikabila wa ndani kuunda bodi ya wakurugenzi kwa ajili ya manispaa hiyo. Hii itafanya Afgoye kuwa mji wa kwanza kukombolewa kutoka kwa al-Shabaab kufurahia utawala wa ndani uliochaguliwa, kwa mujibu wa mchambuzi wa masuala ya kisiasa Jamila Hanafi.

Hanafi aliiambia Sabahi kuwa kamati ya fedha itawajibika katika kukusanya kodi za mji huu na kuzifanyiakazi ya kurejesha huduma za kijamii kama vile shule na hospitali na kukarabati mitaa mikubwa ya mji huu.

Mohamed Baraako, mkazi wa Afgoye, aliiambia Sabahi kuwa watu wa ndani wanatokea katika makabila mbalimbali lakini wameunganishwa na maadili makubwa kama vile ukarimu, uthubutu, upole, huruma na uaminifu.

Pasipo al-Shabaab, watarudia njia yao ya kwanza ya upendo na amani, hawatachukua silaha, alisema.

“Wakazi wa Afgoye kwa ujumla wana amani na maisha yao yametiwa alama ya urahisi na umaskini, lakini hatakufa njaa kwa sababu ardhi yao yenye rutuba inazalisha matunda mengi na mazao,” Barako alisema.