• 5 Maoni
• Chapisha
• Baruapepe
• Tweet
• Panga upya

Awamu ya kwanza ya mradi wa reli za abiria jijini Nairobi iko njiani kuanza kazi ya kuchukuwa abiria mwezi ujao.

Mradi huo unadhamiria kupunguza msongomano katika eneo la Nairobi na kurahisisha upatikanaji wa usafiri wa umma kati ya eneo la kibiashara la kati ya mji na maeneo ya ng’ambo ya mji mkuu huo wa Kenya.

Kwa mujibu wa wizara ya usafirishaji ya Kenya, mradi huo unaogharimu shilingi bilioni 24 (dola milioni 283) umegawanywa katika awamu nne, ukiunganisha wilaya ya kati na miji ya Syokimau, Ngong, Kiserian Kikuyu na uwanja wa ndege wa kimataifa wa Jomo Kenyatta, kwa mujibu wa Wizara wa Uchukuzi.

Mradi huo unajumuisha kuzitengezea njia za reli zilizopo, kuboresha vituo, alama za barabarani na vifaa vingine, ununuzi wa magari mapya ya reli na utanuzi wa huduma za reli mpaka uwanja wa ndege.

Awamu ya kwanza ya mradi – barabara ya kilomita 2.2 kuunganisha kituo cha reli Syokimau na kituo kikongwe cha Embakasi – ilikamilishwa tarehe 30 Mei.

Reli ya Syokimau-Wilaya ya Kati inatarajiwa kuanza shughuli zake za kibiashara mwishoni mwa mwezi Julai, ikigharimu jumla ya shilingi milioni 200 (dola za Kimarekani milioni 2.4) na ikitegemewa kuchukua abiria 10,000 itakapokamilika.

Waziri wa Uchukuzi wa Kenya, Amos Kimunya, alisema kituo cha reli cha Syokimau kitafika mpya kuondosha msongamano mjini na kuimarisha sekta ya usafirishaji.

“Tutahakikisha kuwa kuna kiwango cha juu cha treni zinazofanya kazi kila siku kukidhi matakwa ya wasafiri,” alisema baada ya kuchagua kituo hicho hapo Mei, kwa mujibu wa gazeti la The Star la Kenya.

“Hutalazimika tena kuganda tena kwenye foleni kwa masaa mengi,” alisema.

Reli hiyo ya Syokimau-Wilaya ya Kati ni reli ya mwanzo kujengwa nchini Kenya tangu Vita vya Pili vya Dunia. Njia ya mwanzo ya reli iliyojengwa na Waingereza kati ya mwaka 1896 na 1901, inatoka mji wa bandari wa Mombasa hadi Kisumu kupitia fukwe za Ziwa Viktoria. Nyongeza mpya itaunganisha barabara mpya katika kituo cha treni cha Nairobi katika wilaya ya kati.

Meneja Mkurugenzi wa Shirika la Reli la Kenya, Nduva Muli, aliwaambia waandishi wa habari mwezi uliopita katika safari ya mwanzo ya uzinguzi kutoka Syokimau kwenda mji mkuu, kuwa ujenzi wa awamu nyingine tatu zilizobakia utaanza mwakani.

Serikali inafikiria kuupa fedha uwanja wa ndege kufadhili sehemu iliyobakia ya mfumo huo wa usafiri wa treni, baada ya mpango wa dhamana wa shilingi bilioni 17 (dola milioni 20) kushindwa kufanya kazi, kwa mujibu wa gazeti la The Standard la Kenya.

Mara tu utakapofanikiwa mfumo mzima wa reli utakuwa na uwezo wa awali wa kuwasafirisha abiria 170,000, kwa mujibu wa InfraCo Africa, ambayo imekuwa ikifanya kazi na shirika la reli la Kenya kwenye mradi huo tangu mwaka 2009.

InfraCo ilisema mradi huo utafungua fursa mpya kwa ajili ya ajira na makaazi na utatoa usafiri wa uhakika kwa wakaazi wa mji huo na wageni. Wafanyabiashara wanaosafiri watafaidika na huduma ya usafiri wa moja kwa moja kutoka uwanja wa ndege hadi kitovu cha mji.

Mtandao wa reli wa kisasa ni sehemu ya mpango wa maendeleo wa Dira 2030 wa Kenya, na sehemu ya juhudi za sasa za serikali kuiimarisha huduma ya usafiri katika nchi. Miradi mingine mikubwa ya hivi karibuni inajumuisha barabara kuu ya Thika, barabara kuu ya Nairobi-Mombasa na utanuzi wa Uwanja wa Ndege wa Kimataifa wa Jomo Kenyatta.

Kuufanya mji mkuu wa kisasa

Martin Gateri, mhandisi na mshauri kwa makampuni binafsi na serikali juu ya miradi ya miundombinu, anasema mradi huo wa reli utaufanya mji wa Nairobi kuwa wa kisasa, akiufananisha na miji mikubwa ya kimataifa ambako usafiri unafanyika kupitia treni zinazotembea kwa kasi.

“Mradi huu ni muhimu sana kwani unakusudiwa kuondosha msongomano barabarani na kuupa mji taswira nzuri kwa kuanzisha njia rahisi na yenye ufanisi ya usafiri kwa ajili ya mji huu unaokuwa haraka.” Gateri aliiambia Sabahi.

Ingawa kumekuwa na wasiwasi kuhusu uhamishwaji wa watu wanaoishi katika eneo litakalotumia kujenga njia mpya ya reli, Gateri alisema kujitolea sadaka ni lazima kwa kupatikana maendeleo.

“Ujenzi wa reli nchini Uingereza mwaka 1880 uliifungua nchi na kuweka msingi wa kuifanya jamii yao kuwa ya kisasa,” alisema. “Kujenga njia mpya ya reli nchini kote ni moja ya hatua za kwanza ya Kenya kuinua [watu wenye kipato cha kati] taifa,” alisema.

Mwanauchumi Tiberius Barasa alisema kuwa treni mpya zitasaidia kupunguza msongamano jijini, lakini faida za uchumi hazina uhakika sana.

“Faida ya njia hii ni kuwa itapunguza msongamano katika barabara kuu zinazoelekea ndani na nje ya mji, pamoja na kupunguza wakati ambao waendeshaji hukaa katika msongamano wa barabarani,” alisema. Hata hivyo, kiuchumi, faida zitakuwa kidogo, kwa vile njia za reli zitakuwa fupi sana kwa kasoro ya kilomita 30.”

Kwa mujibu wa Wizara ya Uchukuzi, njia ya Kituo cha Reli reli cha Syokimau-Nairobi kitakuwa na urefu wa kilomita 20.

Kuzalisha faida za maana aa kiuchumi, Barasa alisema mfumo wa reli inahitaji kufika miji ziliko mbali ya mji mkuu, kama vile Eldoret, Nakuru na Machakos, ili kurahisisha usafirishaji wa bidhaa na kukuza biashara.

Francis Gichuki, mhandisi wa sayansi ya kimazingira katika Chuo Kikuu cha Nairobi, alisema njia mpya za reli zitaleta baadhi ya mafanikio ya kimazingira.

Gichuki aliiambia Sabahi kuwa reli ambazo Shirika la Reli la Kenya zinatumia ni za zamani na si rafiki wa mazingira kuliko treni mpya kabisa katika soko. Hata hivyo, alisema athari za kimazingira za treni kongwe bado ni kidogo kuliko matumizi ya gari.

Mradi huu utafanikiwa zaidi ikiwa nchi itamudu kuweka injini za kisasa zenye kutoa hewa chafu kidogo, Gichuki alisema. Alisema hii itasaidia maendeleo ya kimazingira, kwa vile mfumo mpya ulio safi na wenye uwezo ni muhimu katika kupunguza hewa chafu na matumizi ya mafuta.