• 12 Maoni
• Chapisha
• Baruapepe
• Tweet
• Panga upya

Vikosi vya Serikali ya Mpito ya Somalia (TFG) vikiungwa mkono na majeshi ya Kenya vimeanza operesheni kubwa ya kuelekea kwenye mji wa pwani wa Kismayo, mji mkuu wa mkoa wa Lower Juba ulio kusini mwa Somalia.

Kuuchukuwa mji huo wa bandari kutoka mikononi mwa al-Shabaab kutakata ufadhili kwa kundi hilo linalonasibishwa na al-Qaeda, ambalo linauchukulia mji wa Kismayo kama kitovu chake cha kifedha.

Wasafiri wanaoitumia barabara inayounganisha miji ya Afmadow na Kismayo waliiambia Sabahi kwamba majeshi ya Somalia na Kenya wameendelea kusonga mbele kuelekea mji mdogo wa Bulo Haji, magharibi ya Kismayo, huku vikosi vya TFG vikiripotiwa kuwa umbali wa kilomita 110 kutoka mji huo wa bandari.

“Magaidi wako kwenye kitanda chao cha mwisho cha mauti na dakika ya mwisho inakaribia,” alisema Mahmoud Dahir Farah, msemaji wa vikosi vya Somalia katika mkoa wa Lower Juba. “Tutapigana nao mpaka wasalimu amri au waihame nchi yetu.”

“Tunajitayarisha kwa mashambulizi na kuwazuia kuingia kwenye msitu wa kusini, ambao tangu mwaka 2007 wameutumia kama sehemu ya kujifichia na sasa baada ya kufukuzwa kwenye mji wa Mogadishu na sehem nyengine za nchi,” Farah aliiambia Sabahi. “Haiwezekani kwao kupata mahala pa kujificha na tutawashinda kwa sababu tuna rehema za Mwenyezi Mungu na uungwaji mkono kutoka kwenye miji na kwa wanavijiji.”

Habari zisizothibitishwa za vyombo vya habari zinasema kuwa viongozi wa al-Shabaab wanaanza kuuhama mji wa Kismayo wakati majeshi ya Somalia na washirika yakisonga mbele. Redio RBC ya Somalia iliripoti hapo Jumanne (tarehe 5 Juni) kwamba makamanda kadhaa wa al-Shabaab wameonekana wakiuhama mji huo.

Hivi karibuni al-Shabaab waliutelekeza mji wa Afmadow, ulio umbali wa kilomita 114 kaskazini mwa Kismayo, bila ya kuleta upinzani wowote. Mji huo ulio nyumbani kwa maelfu ya watu ni kituo muhimu cha kibiashara kwa vijiji kadhaa vya karibu na una barabara unayoiunganisha na Kismayo na Buale.

Mkaazi mmoja wa Afmadow, Dhayib Aato, aliiambia Sabahi kwamba al-Shabaab ni kama samaki na watu wa Somalia ni kama bahari kubwa iliyochafuka. Alisema watu wamekataa kutoa hifadhi kwa al-Shabaab kwa sababu kundi hilo limeharibu miundombinu ya nchi na kuuwa wasomi, masheikh, wanafunzi na waandishi wa habari wa Kisomali kukidhi matakwa ya wahalifu waliojitolea kwa ajili ya fujo ulimwenguni kote.

Mkaazi mwengine wa Afmadow, Mohammed Nur, aliiambia Sabahi kwamba al-Shabaab imemwaga damu ya Waislamu, kuvunja imani ya Uislamu, ambayo inataka pawepo uvumilivu na kusameheana na kuacha ghasia, wasiwasi na chuki.

Mwanajeshi wa Kisomali aliyepo mjini Afmadow, Abdi Abukar, alisema al-Shabaab haifahamu maana halisi ya jihadi.

“Ikiwa kweli ni mujahidina, kwa nini wakawa wanakimbia medani ya vita baada ya mapambano? Mara kadhaa tunawaona wakikimbia bila ya hata kukusanya maiti na majeruhi wao,” aliiambia Sabahi. “Kwa ukweli hasa, ni woga na wanajizuia kupambana uso kwa macho na wanapendelea kurushiana makombora na mizinga huku wakijaribu kuchukua madaraka kwa mtutu wa bunduki.”

Al-Shabaab yawekwa pabaya, baadhi wajisalimisha

Wachambuzi wamekuwa wakirejea kueleza kila mara kwamba kundi hilo linalojiambatanisha na al-Qaeda linaelekea kuporomoka, huku wapiganaji wake wakipoteza moyo wa mapambano mbele mapigo mfululizo kutoka majeshi ya Somalia na vikosi washirika na pia wakikabiliwa na kuzorota kwa ufadhili wa kifedha kwao. Kundi moja la makamanda wa al-Shabaab wanaunga harakati ya pembeni kushauriana na TFG, kamanda wa al-Shabaab aliiambia Sabahi.

Ndani ya kipindi cha wiki mbili zilizopita, al-Shabaab wamepoteza mji wa Afgoye kwenye mkoa wa Lower Shabelle na Afmadow katika mkoa wa Lower Juba. Sasa kundi hilo linarudi kwenye upiganaji wa msituni na mbinu za kushambulia na kukimbia, jambo ambalo linaweza kumaanisha mwisho wa operesheni za kigaidi za al-Qaeda katika Pembe ya Afrika, wanasema wachambuzi.

Wapiganaji wa al-Shabaab wanakabiliwa na mapigano katika gome zao zilizobakia huku wanajeshi wa Somalia wakielekea katika mkoa wa Lower Juba kutokea Gedo na Middle Juba, huku majeshi ya washirika yaliyo kwenye miji ya Mogadishu na Afgoye yakijitayarisha kuushambulia mkoa wa Middle Shabelle.

Ahmed Mohammed Islan, kiongozi wa wanamgambo wanaoiunga mkono serikali katika Ras Kiamboni, aliiambia Sabahi kwamba vikosi vya washirika vitasonga mbele kuuchukua mji wa Kismayo katika mkoa wa Lower Juba na miji ya Buale na Jilib katika mkoa wa Middle Juba.

Huku vikosi vya washirika vikiwakaribia wapiganaji wa al-Shabaab, baadhi ya wapiganaji hao wamejisaliisha kwa serikali ya mpito, Aadan Hirsi, msemaji wa jeshi la Somalia mjini Gedo aliiambia Sabahi.

“Kundi lililojitenga kutoka al-Shabaab limejisalisha kwetu,” alisema. “Kundi hilo linajumuisha wapiganaji 20 wenye silaha zikiwemo bunduki na gari la kubebea makombora. Walipokelewa katika mji wa Beled Hawo baada ya kunyang’anywa silaha, ikiwa ni hatua ya mwanzo ya kuwatayarisha na kuwaingiza kwenye jamii katika kituo maalum kwa ajili ya raia walioachana na wapiganaji wenye siasa kali.”

“Wapiganaji wengine wa al-Shabaab bado wana nafasi ya kujisalimisha kabla ya vikosi vyetu havijachukuwa udhibiti wa miji yote iliyo sehemu ya mkoa huu, ikiwemo Bortobo na Baardheere," alisema Hirsi. “Tutatekeleza mpango kamili wa mashambulizi kuchukuwa udhibiti wa maeneo mapya.”