• 4 Maoni
• Chapisha
• Baruapepe
• Tweet
• Panga upya

Maafisa watano wa serikali wamefikishwa mbele ya mahakama ya mkoa ya Hargeisa hapo Jumatatu (tarehe 16 Aprili) wakikabiliwa na mashitaka ya ubadhirifu wa chakula cha msaada.

Washitakiwa hao wakiwemo mkurugenzi mkuu wa zamani wa Wizara ya Makaazi, Ahmed Elmi Bare; gavana wa zamani wa Maroodi Jeeh, Ahmed Omar Haji Abdullahi, na mshauri wa zamani wa Makamo wa Rais Abdirahman Abdullahi Ismail, Osman Said Jama.

Watu hao, waliokana mashitaka dhidi yao, walikamatwa tarehe 10 Machi baada ya kuondolewa rasmi kwenye nyadhifa zao kwa tamko la Rais wa Somaliland, Ahmed Mohamed Silanyo.

"Rais wa Jamhuri ya Somaliland ameamua kuwavua dhamana zao maafisa watatu baada ya kuridhika kwamba walihusika na ubadhirifu wa chakula cha msaada,” alisema msemaji wa serikali, Abdullahi Mohamed Dahir, katika taarifa ya mwezi uliopita.

Mkuu wa Jumuiya ya Ustawi wa Jamii ya Somaliland, Ahmed Ali Guled, aliyekuwa na dhamana ya kugawanya msaada wa chakula, na Abdishakur Abdi Nur, ambaye ni mmiliki wa ghala la vifaa vya ujenzi mjini Hargeisa, nao pia walikamatwa na sasa wanakabiliwa na mashitaka.

Wakili Mohamoud Abdirahman Nur, mmoja wa wanasheria wanaowawakilisha washukiwa, alisema watuhumiwa hao wanashutumiwa kwa kuchukua magunia 2,500 ya mchele na makatoni 400 za maharage.

Chakula hicho kilikuwa ni sehemu ya mzigo wa tani 100 ya msaada uliotolewa na Oman ambayo pia ilijumuisha nguo. Watu hao wanashukiwa kuipeleka shehena ya chakula kwenye ghala la mtu binafsi kwa ajili ya kugawiwa kwa matumizi binafsi, alisema Nur.

Watuhumiwa hao watano, waliojitokeza mahakamani Jumatatu, ni miongoni mwa watu 13 wanaotuhumiwa kuhusika katika kesi hiyo, walisema maafisa wa serikali.

“Watuhumiwa ambao kwa kiasi kikubwa wanatafutwa na vikosi vya usalama na yeyote aliyeshiriki kwenye mkasa huu, hata awe nani, atafikishwa mbele ya mahakama ya sheria,” alisema Mwendesha Mashitaka Mkuu wa Serikali, Hassan Ahmed Aden, alipokuwa akizungumza na waandishi wa habari hapo Jumatatu.

Aden alisema kwamba sheria inaagiza kesi kama hizi kufunguliwa ndani ya siku 45 tangu kukamatwa kwa watuhumiwa, na watuhumiwa hao wamekuwa kizuizini kwa mwezi mmoja tu. “[Wao] hawajawekwa kizuizini zaidi ya vile inavyotakiwa na sheria…haki zao hazijavunjwa,” alisema.

Abdihakim Mohamoud Shirwa, mwandishi wa habari aliyekuwepo mahakamani wakati kesi hiyo ikitajwa kwa mara ya mwanzo, aliiambia Sabahi kwamba kesi hiyo ilivutia watu wengi kwa sababu imekuwa ni mfano.

“Hii ni kesi ya kwanza ya aina yake,” alisema. “Ni mara ya kwanza kwa maafisa wa ngazi za juu serikalini wanaotuhumiwa kwa ufisadi kufutwa kazi, kukamatwa na kufikishwa mbele ya mahakama kwa historia ya Somaliland.”

Siku ya Jumatatu ni mashahidi watatu kati ya 28 wa upande wa serikali waliotoa ushahidi wao mahakamani, alisema Nur. Aliiambia Sabahi kwamba kesi hiyo imeahirishwa hadi tarehe 21 Aprili.

“Natarajia haki itatendeka,” alisema.