• 5 Maoni
• Chapisha
• Baruapepe
• Tweet
• Panga upya

Serikali ya Somalia, mashirika ya haki za vyombo vya habari, na maafisa wa Umoja wa Mataifa na Umoja wa Afrika walilaani mauaji wa mwandishi wa habari Abukar Hassan Kadaf, ambaye alipigwa risasi na watu wenye silaha wasiojulikana nje nyumbani kwake Mogadishu Jumanne jioni (tarehe 28 Februari).

Kadaf alikuwa na umri wa miaka 43 na aliacha mke na watoto wanne. Alikuwa ni mwandishi wa habari wa pili kuuawa mjini Mogadishu mwaka huu.

Akiwa mkurugenzi wa zamani wa kituo cha redio cha Somaliweyn, Kadaf alikuwa anajulikana kama mmoja kati ya watu muhimu sana katika vyombo vya habari na fani ya habari nchini Somalia. Alifanyakazi na mashirika kadhaa ya kijamii na alikuwa mtetezi wa amani.

Kadaf vilevile alikuwa anashiriki kikamilifu katika mashirika ya vijana, ambayo karibuni yaliwahamasisha maandamano mjini Mogadishu kulaani tangazo la muungano baina ya al-Shabaab na al-Qaeda.

“Tukiwa na hisia imara juu ya tukio hili, tunalaani mauaji ya mwandishi huyu wa habari na mkurugenzi wa zamani wa kituo cha radio cha Somaliweyn na tunatoa wito kwa serikali ya shirikisho kufungua mara moja uchunguzi wa kina katika mauaji yaliyofanywa dhidi ya waandishi wa habari ili kuhakikisha kuwa wahalifu wanafikishwa mbele ya sheria na kumaliza kusamehewa,” alisema Mohammed Ibrahim, Katibu Mkuu wa Umoja wa Kitaifa wa Waandishi wa Habari wa Somalia.

“Hii ni moja tu kati ya mfululizo wa ushari dhidi ya waandishi wa habari wa Somalia ambao umekuwa yakitokea,” Ibrahim aliiambia Sabahi. “Huu ni msiba mpya na mwendelezo wa juhudi za kukandamiza uhuru wa kujieleza na vyombo vya habari huru nchini Somalia. Pia ni ishara ya hatari ambayo inawakabili wanaharakati na wale wanaofanyakazi na vyombo vya habari katika mji mkuu, Mogadishu.”

Ibrahim alisema kila juhudi zinawezekana lazima zifanywe ili kuzuia mauaji ya waandishi wa habari na wanaharakati wa jumuiya za kiraia. Aliyaelezea mazingira ambayo waandishi wa habari wanafanyia kazi, ni ya hatari na yenye ugumu mkubwa sana.

“Tuna wasiwasi mkubwa sana na usalama wa waandishi wa habari,” alisema. “Mpaka sasa, hakuna mtu yeyote aliyefikishwa mbele ya sheria wala kuadhibiwa kwa yale waliyoyafanya, na ndio maana wanaendelea kuua waandishi wa habari zaidi. Hili ni suala kubwa la kuwa na wasiwasi nalo jijini Mogadishu na tunaiomba serikali kuwapatia ulinzi zaidi.”

Shirika la Habari la Mogadishu, ambalo liko mstari wa mbele katika kukuza amani na kutetea haki za waandishi wa habari, vilevile lililaani mashambulizi yanayoendelea dhidi ya waandishi wa habari wa Somalia na kuitaka Serikali ya Mpito ya Shirikisho ya Somalia kulichunguza tukio hili.

Abdullahi Mohammed Hassan, mkurugenzi mtendaji wa Shirika la Habari la Somalia, aliyaita mauaji ya Kadafi kuwa ni “ya kutisha na yasiyokubalika”.

Serikali ya Somalia inawashutumu al-Shabaab

Kadaf aliuliwa karibu na nyumba yake katika wilaya ya Wadajir, kusini mwa mji, ambayo ni mojawapo ya sehemu ya Mogadishu yenye amani na utulivu kabisa. Watu wenye silaha wasiojulikana walimpiga risasi Kadaf nje ya nyumba yake, na kumuua hapohapo kabla ya kukimbia toka eneo la tukio.

Hakuna aliyedai kuhusika na shambulio hilo na hakuna mtu yeyote mwenye silaha ameishatambuliwa. Afisa polisi Mohamed Abdulkadir alisema mauaji yako chini ya uchunguzi na ripoti ya awali inaonesha kuwa walikuwa washambuliaji wawili, AFP iliripoti.

Naibu Waziri wa Habari, Barua na Mawasiliano Abdullahi Bile Noor aliwashitumu al-Shabaab kwa mauaji ya mkurugenzi wa zamani wa kituo cha redio.

“Serikali ya Somalia inalaani vikali kulengwa kwa waandishi wa habari na inaelezea masikitiko yake makubwa kwa kifo cha Abubakar Kadaf,” Noor alisema.

Aliongeza kuwa al-Shabaab wameamua kulipiza kisasi bila ya kubagua baada ya upotevu wao wa mapambano ya kijeshi ya hivi karibuni. Ushahidi wa hayo, ni mauaji ya waandishi wa habari na al-Shabaab katika muda wa kasoro ya miezi mitatu.

“Kuwalenga waandishi wa habari na kuwatishia hakukuweza kunyamazisha uhuru wa vyombo vya habari nchi Somalia na vilevile hakutasitisha juhudi zetu za kuleta amani nchi Somalia,” Noor alisema na kuongeza kuwa wahalifu wataandamwa na kupelekwa mbele ya sheria kwa gharama yoyote ile.

Kwa mujibu wa watetezi wa uhuru wa Waandishi wa Habari Wasio na Mipaka, waandishi wa habari 25 wameishauliwa nchini Somalia baina ya mwaka 2007 na 2011.

Salad Ali Jilli, mjumbe wa kamati ya ulinzi ya bunge nanaibu waziri wa zamani wa ulinzi, alisema kwamba uwezo wa vikosi vya usalama kuendesha uchunguzi wa mara moja una dosari. Alisema ilikuwa ni muhimu kuwatambua wale waliohusika na uhalifu na mashambulizi dhidi ya wafanyakazi wa vyombo vya habari na wanaharakati, na kuwapeleka mbele ya sheria.

“Hatuwezi kukubali mauaji yanayoendelea, ambayo yanakandamiza haki ya watu wa Somalia kuishi,” Jilli aliiambia Sabahi. “Na hii ni kweli hususani kwa viongozi wa jamii, na ndio maana tunaitaka serikali na vikosi vyake vya usalama kurudufu juhudi zake katika kuwinda watu wanaohusika na uhalifu huu.”

Kuua waandishi wa habari ni 'uhalifu usiovumiliwa'

Somaliweyn kilikuwa kituo cha radio cha kujitegemea kaskazini mwa Mogadishu. Kituo kilivamiwa mwaka 2010 na wanamgambo wa al-Shabaab ambao walibeba vifaa vya utangazaji na kompyuta.

Wenzake Kadaf waliiambia Sabahi kwamba alikuwa na mipango ya kuzindua upya kituo hicho na karibu alikuwa mstari wa mbele katika jamii kwa vile alikuwa anajihusisha na siasa za eneo.

Wawakilishi kutoka Umoja wa Mataifa na Umoja wa Afrika walilaani kifo cha Kadaf na kuahidi kuvisaidia vyombo vya usalama vya Somalia kuwafikisha wahalifu mbele ya sheria.

Mjumbe Maalumu wa Umoja wa Afrika nchini Somalia Boubacar Gaoussou Diarra alisema, “Mauaji ya waandishi wa habari wanaowakilisha sauti za watu...ni uhalifu usiovumilika.”

“Asasi za mpito za shirikisho lazima zirudufu juhudi zao za kumaliza utamaduni wa kutoshitakiwa na kuanzisha mara moja uchunguzi huru ili kuwafikisha wahalifu mbele ya sheria,” alisema Augustine Mahiga, mjumbe maalumu wa Katibu Mkuu wa Umoja wa Mataifa nchi Somalia.

Mahiga alisema Ofisi ya Siasa ya Umoja wa Mataifa Somalia ilikuwa tayari kutoa msaada unaohitajika kuhusu hilo.

“Ninatoa heshima zangu kwa waandishi wa habari hodari wa Somalia ambao wanafanyakazi katika hali ngumu sana ili kuweka shinikizo kwa wahalifu hawa wanaojaribu kuwatisha watu wa Somalia,” Mahiga alisema. “Ninatoa wito kwa wale wanaolinda haki za msingi za uhuru wa kujieleza wasirejeshwe nyuma na vitendo hivi vya ugaidi.”