• +hoos ku faallee
• Daabac
• Email
• Tweet
• Dib u celi

Kooxda Kenyanka ah ee baadi-goobka ayaa Khamiistii (16-kii August) helay afartii mayd ee ugu dambeeyay ciidamadii Ugandha u dhashay ee ku dhintay burburkii helikobtarkii millatari ee dhammaadkii todobaadkii tagay, taasoo dhimashada ka dhigtay todoba, sidaana waxa sheegay ciidanaka Kenya.

“Dhammaan todobada mayd ayaa laga ag helay burburka gubtay ee helicopterka, dabadeedna waxa loo soo duuliyay Nairobi […] Haatan waxaan si nabad-galyo ah ku oran karnaa in uu soo gabagaboobay howl-galkii badbaadinta,” ayuu yiri af-hayeenka ciidamada Kenya Bogita ongeri, sida ay sheegtay AFP-du.

Hal helicobtar ayaa la helay Isniintii, iyaga oo dhammaan la badbaadiyay ciidamadii todobada ahaa ee la socday. Burburka laba helikobtar oo kale ayaa la helay Talaadadii, iyada oo mid ka mida diyaaradahaasi ay si aad ah u gubatay.

Siddeed askari oo ka badbaaday helikobterka labaad ayaa ku soo dhex lugeeyay kayn ciriiri ah masaafo siddeed kiiloomitir ah iyaga oo raadinayay caawimaad, dabadeedna waxa Talaadadii loo soo duuliyay Nairobi.

Diyaaradda ayaa ku soo dhacday kayn jiq ah oo ku taal dhul buurallay ah oo ku dhex yaal buurta Mount Kenya, oo ah buurta labaad ee ugu dheer Afrika oo dhererkoodu yahay 5,199 mitir.