• 2 Faallo
• Daabac
• Email
• Tweet
• Dib u celi

Oradyahanka reer Kenya David Rudisha ayaa ku guulaystay billadda dahabka ah ee orodka 800 ee mitir ee ragga ee Olambikada London Khamiistii (9-kii Agoosto), isaga oo dhigay rikoor cusub oo caalami ah kadib markii uu ku orday 1 daqiiqo iyo 40.91 il-biriqsi.

"Kaasi waxa uu ahaa orod aad u heer sareeya. David Rudisha waxa uu muujiyay kalsooni jismiyeed iyo mid maskaxeed oo aad u heer sareeysa markii uu illaa iyo heerkaa u orday ciyaarihii kama-dambaysta ahaa ee Olambikada," ayuu yiri Sebastian Coe, guddoomiyaha Guddiga Qaban-qaabada Ciyaaraha Olambikada ee London iyo Olambikada Naafada, oo ruuxiisu horay u ahaan jiray horyaalka orodka 800 ee mitir.

Rudisha waa orodyahankii ugu horreyay ee Olambikada oo rikoor caalami ah dhiga Ciyaaraha London. Waxa masraxa lagu bixiyo billadaha ku weheliyay Jijel Amos oo u dhashay Botoswana kuna guulaystay billadda qalinka ah iyo ninka ay isku waddanka ka soo jeedaan Timothy Kitum oo ku guulaysta billadda maarta ah.

"Waa dareen aad u wanaagsan in inta halkan imaado aan jabiyo rikoorka caalamka," ayuu yiri Rudisha. "Sannadkan aad ayaan isku soo diyaariyay, shakina iigama jirin in aan guulaysan doono. Laakiin waxa aan sugayay duruuf munaasib ah oo aan ku jabin karo rikoorka caalamiga ah waayo waan ogaa in aan sannadkan ku ordi karo 1 daqiiqo iyo 40 il-biriqsi.

Guusha Rudisha ayaa sii waday taariikha qoyskooda, iyada oo aabihii horay ugu guulaystay billadda qalinka ee ororka 400 ee mitir ee qori isku-dhiibka Ciyaarihii Olambikada ee Mexico 1968-kii.