• 1 Faallo
• Daabac
• Email
• Tweet
• Dib u celi

Soomaaliya waxa ay ku tallaabsanaysaa horumar amaan mudan oo ay u qaadayso geedi-socodkeeda dastuuriga ah iyada oo dalku u dabaal-dagayo sannad-guuradii 52-aad ee ka soo wareegatay madax-bannaanida, sidaana waxaa war-murtiyeed Axaddii (1-dii Juulaay) ku sheegay Wakiilka Gaarka ah ee Xoghayaha Guud Qaramada Midoobay u qaabilsan Soomaaliya Augustine Mahiga.

"Tani waa marxalad rajo-wanaag galinaysa dhammaan dadka Soomaaliyeed," ayuu yiri, isaga oo Soomaalida ugu yeeray in ay ku dhaganaadaan hufnaan, isla-xisaabtan iyo in si ballaaran looga qayb-galo hannaanka geedi-socodka lagu jiro. "Meel-marinta dastuurka ku-meel-gaarka ah waxa uu tallaabo muhiim ah u noqon doonaa in la dhiso dawlad si dhab ah u matasha Soomaaliya, taasoo aan lahayd dawlad dhexe oo shaqaynaysa muddo ka badan 20 sano," ayuu yiri.

Shirka Golaha Degaannada Qaranka ayaa qabsoomi doona inta u dhexeeysa 12-ka Juulaay illaa 20-ka Juulaay si ay dib-u-eegid ugu sameeyaan dabadeedna u ansixiyaan dastuurka qabyada ah, kaasoo ay horay u soo ansixiyeen hoggaamiyayaasha dawladda. Hoggaamiyayaasha qabaa'ilka ayaa haatan ka shaqaynaya in ay magacaabaan xubnaha ergada golaha.

Mahiga ayaa ku dhiira-galiyay Soomaalida in ay ka shaqeeyaan danaha qaranka waxaana uu beesha caalamka ku tirtirsiiyay in ay taageeraan geeddi-socodka siyaasadeed ee Soomaaliya iyada oo ay sii dhammaanayso xaaladdii ku-meel-gaarnimadu. "Guusha ay gaaraan Golaha Degaannada Qaranka ayaa waxa ay ahamiyad gaar ah u lahaan doontaa sidii loo joogtayn lahaa fursadda yididiillada isla markaana loo dhisi lahaa baarlamaan ka awood badan kii hore, kana howl-karsan kaasoo hanan kara kalsoonida dadka Soomaaliyeed afarta sano ee soo socda," ayuu yiri.