• 1 Faallo
• Daabac
• Email
• Tweet
• Dib u celi

Ragg hubasan ayaa ugu yaraan hal qof ku dilay xeradaa Dhadhaab oo ku taala meel u dhow xudduudda ay Kenya la wadaagto Soomaaliya, islamarkaana af-duubay afar kale jimcadi (29-kii Juun), AFP ayaa warisay.

“Afar shaqaale gargaar oo ajanabi ah iyo dareewalkooda oo ay u badan tahay in uu Keenyaan ahaa ayaa la af-duubay,” ku-xigeenka taliya bilayska gobolka Waqooyi Bari Philip Ndolo ayaa AFP u sheegay

“Dadka la qafaashay ayaa u kala dhashay dalalka Canada, Norway, Pakistan iyo Philippines,” ayuu yiri

Bilayska ayaa ku daba jira af-duubayaasha, oo la haystayaasha ku kaxaystay gaarigooda.

Saraakiil caafimaad oo ka tirsan hay’adda gargaarka ee dowladda Jarmalka (GIZ) ayaa sheegay in dareewal ka tirsanaa Golaha Qaxootiga Norway (NRC) uu geeriyooday, halka laba kalena ay ka dhaawacmeen intii uu weerarku socday kaasoo ka dhacay agagaarka xerada qaxootiga Ifo2 abbaaraha duhurnimadii.

“Xubin ka tirsan shaqaalaha NRC ayaa geeriyooday, laba kalena waa ay dhaawacmeen,” ayuu yiri Faysal Cabdulaahi oo ah sarkaal caafimaad oo ka tirsan GIZ.

Af-duubkan ayaa ahaa kii ugu dambeeyay sisilado weeraro ah oo lagu soo qaaday xerada Dhadhaab, oo ah meesha ay rag hubaysani ka af-duubteen labada shaqaale oo Isbaanish ah oo u shaqaynayay hay’adda dhaqaatiirta aan xudduudda lahayn. Shaqaalahaasi ayaa wali lagu haystaa gudaha Soomaaliya.

Xerada Dhadhaab ayaa ah xerada ugu weyn dunida, waxaanna daggan in ka badan 465,000 oo qof qiyaastii la sameeyay dhammaadki bishii May.