• 1 Faallo
• Daabac
• Email
• Tweet
• Dib u celi

Golaha Qaxootiga Danmark oo loo soo gaabiyo (DRC) ayaa ballaarinaya barnaamijkeeda ku saabsan in dadka hela gargaarka bini’aadannimo ee jooga Soomaaliya ay talooyinka uga baxshaan adeegga loo fidiyo iyaga oo isticmaalaya farriimaha laga diro telefoonka gacanta, sidaana waxa Talaadadii (12-kii June) sheegay hay’adda.

DRC ayaa sidoo kale sheegtay in ay qorshaynayso in ay barnaamijka gaarsiiso dalal kale.

“Waxa ay noo tahay dhiiri-galin in aan si toos ah dadka uga helno ra’yigooda, kuwaa oo aan halkan u joogno sidii aan u caawin lahayn,” ayuu yiri Peter Klansoe, oo ah maamulaha goboleed ee DRC u jooga Geeska Afrika iyo Yemen. “Waxannu ogaannay in dadka la siiyo gargaarka ayan inta badan helin fursad ay ku cabbiraan ra’yigooda. Sidaa darteed, waxa naga go’an in aannu Soomaaliya ku baahinno isticmaalka farriimaha laga diro telefoonka gacanta oo aan isla markaana ku dabakhno dalal kale.”

Tan iyo 2011-kii, barnaamijka waxa laga fuliyay 31 tuulo iyo magaalo ku yaal waqooyiga iyo bariga Soomaaliya. Mashruuca ayaa hadda waxa uu soo gaaray Muqdisho, halkaa oo ay dadka deeqda helaayi ay soo dirayaan boqolaal farriimo ah, ayay sheegtay hay’addu.

DRC ayaa talooyin aan wax faafreeb ah lagu sameeyn oo ay ka heshay dadka waxa ay ku soo bandhigtaa bogga ay ku leedahay internetka iyo aaladaha kale ee ay bulshadu ku xiriirto.