• 1 Faallo
• Daabac
• Email
• Tweet
• Dib u celi

In ka badan 40 qof ayaa dhintay 60,000-na waa ay barakaceen kadib markii ay daadad iyo dhul-go’yo ku dhufteen qaybo kamida Kenya, sidaana waxa Khamiistii (3-dii May) qoray Daily Nation-ta Kenya.

Laba qof ayaa sida la wariyay la la’yahay 42 qof oo kalena waa ay dhaawacmeen, sida ay sheegtay afhayeenka ururka Laan-qaydha Cas ee Kenya Nelly Muluka. Waxa ay sheegtay in biyaha fatahaya ay gabi ahaanba aaseen guryo ay ku noolaayeen qiyaasta 100 qoys.

“Ka dib barakacaas, Laan-qaydha Cas waxa ay qoysaska ay fatahaaduhu saameeyeen u qaybisay teendhooyinka bacaha ka sameeysan, bustayaal, mara-kaneeco, agabka jikada, jirgaanno iyo waliba agabyo kale,” ayay tiri Muluka.

Heerka biyaha ee Wabiga Nzoia ayaa kor u kacay qiyaasta shan mitir, “taas oo ah xaalad laga walwalo,” ayay tiri.

“Ka dib markii uu sara-kacay heerka biyuhu, ayay shaqaalaha Laan-qaydha Cas waxa ay bulshada deggan goobaha halista ah ku waaniyeen in ay u ruuqaansadaan dhulka jooggiisu sarreeyo,” ayay tiri Muluka.

Laan-qaydha Cas ayaa Khamiistii barnaamij caafimaad u biloowday dadka daggan Nyanza, kuwaa oo ku barakacay fatahaadaha.