• +hoos ku faallee
• Daabac
• Email
• Tweet
• Dib u celi

Wasaaradda Caafimaadka Tansaaniya ayaa ku boorrinaysa muwaaddiniinteeda in ay ka qayb-qaataan barnaamij tallaal oo billowday Arbacadii (25-kii April) soconna doona toddobaad dhan.

"Waxaannu u baahannahay in aannu tallaallo carruurta oo dhan in kasta oo aannu bar-tilmaameedsanayno hooyooyinka seegay fursad carruurtooda loogu tallaalo barnaamijyada joogtada ah ee tallaalka,” ayuu shir jaraa’id oo uu Talaadadii qabtay ka yiri Yussuf Makame oo u shaqeeya waaxda Barnaamijka Tallaalka Guud ee wasaaradda.

Tallaalada bilaashka ahi waxay isku mar dhacayaan Toddobaadka Tallaalka Afrika oo ah 23-da ilaa 29-ka April. Zanzibaar ayay wasaaraddu ku tallaalaysaa dhallaanka ka yar halka sano iyadoo ka tallaalaysa cudurro dhawr ah oo ay ka mid tahay teetanada, qaaxada, gawracatada, iyo jadeecada. Makame ayaa wuxuu sheegay in ay tallaalladani qayb ka yihiin qorshaha dalka ee ku aaddan ee higsanaya Yoolka Horumarka Kun-sanaalaha ee qeexaya in la dhimo dhimashada carruurta labo ka meeloo saddex marka la gaaro 2015-ka.

Xilli hore oo toddobaadkan ah, ayuu Wasiirka Caafimaadka iyo Wacnaanta Bulshada, Hadji Mponda wuxuu sheegay in barnaamijyada Tansaaniya ee tallaalku ay mar horeba dhimeen in ka badan 80% xaddigii dhimashada ee carruurta ay da’doodu shanta sano ka hoosayso, muddadii u dhexaysay 1999 ilaa lagu keeno 2010, The Citizen oo Tansaaniya ka soo baxda ayaa werisay.