• +hoos ku faallee
• Daabac
• Email
• Tweet
• Dib u celi

Raysal wasaaraha Soomaaliya, Cabdiweli Maxamed Cali ayaa sheegay in weerarkii Masraxa Qaranka ee Arbacadii (4-ta April) aanu leexin doonin dedaallada ay dawladdu kula dagaallamayso al-Shabaab, Garowe Online-ta Soomaaliya ayaa werisay.

"Tani na bajin mayso, nagana lexin mayso jidkii aannu haynay,” ayuu Cali ka yiri shir jaraa’id oo uu Muqdisho ku qabtay sacado ka dib qarixii dhacay, “Al-sshabaab waxaa soo wajahday guuldarro taa ayaana sabab u ah in ay u ciirsadaan tabaha diciifka ah oo yaqyaqsiga mudan sida kuwan oo kale.”

Ugu yaraan lix qof ayaa la diley 10-na waa la dhaawacay ka dib markii sida la sheegay ay gabar yari qarxisay suun miinooyin ah oo u xirraa, taa oo lala beegsanayey Cali iyo saraakiisha kale ee dawladda ee u dabbaaldegayey sanad-guuradii koowaad ee saldhigga telefishanka dawladda.

"Dad aan waxba galabsan ayaa lagu diley qaraxa dawladda FKMG ahina waxay samaynaysaa wax kasta oo ay ku hagaajinayso amniga si aanay u dhicin weerarrada caynkan oo kale ah,” ayuu yiri Cali, isagoo uga mahadceliyey saraakiisha amniga, ciidamada iyo bilayska sida ay ugu guulaysteen in ay ka hortagaan weerarro caynkaas oo aad u tiro badan oo Muqdisho ka dhici lahaa.

Ciidamada amniga ayaa caasimadda uga jira hegan buuxa, sida uu Arbacadii Idaacadda Shabeelle u sheegay ku xigeenka madaxa amniga gobolka Banaadir Warsame Maxamed Joodax.

Muqdisho ayaa waxaa halkeeyey werarro garnaylo ah iyo kuwo is-biimayn ah ila berigii ay bishii August kooxda al-Qaacida la xulufada ah ee xarakada al-Shabaab ay uga heleeleen saldhigyadii joogtada ahaa ee ay ku lahaayeen caasimadda, oo ay markaa u ciirsadeen taatikada goriillaynta.

Raysal wasaaraha ayaa tacsi u gudbiyey qoysaska dadkii qaraxa ku geeriyooday oo uu ku jiray guddoomiyihii Guddiga Olombikada Soomaliyeed Aadan Xaaji Yabaroow “Wiish” iyo guddoomiyihii Xiriirka Kubbadda Cagta Soomaaliya, Saciid Maxamed Nuur “Mugaanbe.”