• +hoos ku faallee
• Daabac
• Email
• Tweet
• Dib u celi

Midowga Yurub ayaa kordhinaya taageeradooda bani’aadannimo, siyaasadeed, iyo horumarineed ee Soomaaliya, sidaa waxaa waraysi la daabacay Isniintii (19-ka March) Idaacadda Radio RBC ugu sheegay Wakiilkooda Khaaska ah ee Geeska Afrika, Alex Rondos

Rondos ayaa Axaddii la kulmay Raysal Wasaaraha Soomaaliya, Cabdiweli Maxamed Cali si ay uga wada hadlaan xaaladda nabadgelyada. “Waxaan is leeyahay waxaad aragteen in xaaladda nabadgelyo ee Muqdisho gudaheeda iyo bannaankeedaba ay isa sii beddelayso, oo ay meelo badan ay nabad sii noqonayaan,” ayuu yiri Rondos.

Wuxuu sheegay in uu arko horumarka siyaasadeed ee Soomaaliya, iyo sida ay Soomaaliya ugu socoto in ay midowdo ka dib markii uu dhamaado Waqtiga Sharcinnimada ee Dawladda Federaalka KMG ah oo ku aaddan August. Waxa kale oo uu sheegay in Midowga Yurub uu khaas ahaan uga walaacsan yahay heerka nololeed ee dadka gudaha dalka ku barakacay, iyo sida lagu heli karo dariiqo ay Soomaalidii dibadaha u baxday dalkooda ugu soo noqon lahaayeen.

Midowga Yurub ayaa Soomaaliya ugu deeqay in ka badan 1 bilyan oo yuuro, doonayana in uu “dhiirriggeliyo wax kasta oo hab dawladeed ay Soomaalida oo dhan aaminsan yihiin meeshan ka samaynaya,” ayuu yiri Rondos.