• +hoos ku faallee
• Daabac
• Email
• Tweet
• Dib u celi

Reer tansaaniya waa in ay si adag u shaqeeyaan si ay u xaqiijiyaan in aanay carruur iyo hooyo midna dhiman xilliga uurka iyo marka ay haweenku umulayaanba, ayay Salma Kikwete ku tiri dad maalintii Khamiista isugu soo baxay munaasabad khaas ah (White Ribbon Day) si loo yididiilo-galiyo nabdoonaanta hooyooyinka.

"Dhimashada la xiriira xanuunnada uurka ku tacalluqa ayaa hoos uga dhacay 8,000 oo gaaray 7,000 sanadkii, iyadoo geerida carruurta hal sano ka yarna ay hoos uga dhacday 51,000, ayna gaartay 41,000 sanadihii u dhexeeyey 2005-kii ilaa 2010-kii,” ayay tiri marwo Kikwete. Waxay sheegtay in natiijooyinku ay yihiin kuwo “rajo fiican leh, laakiinse dagaalku uusan ku dhaweyn in uu dhamado iyadoo bar-tilmaameeedku uu yahay in la xaqiijiyo in aanay waxba dhiman.”

Tansaaniya ayaa waxay haatan leedahay waaridda dhallaanka ee ugu sarraysa Bariga Afrika.

Waxaa kaloo ay sheegtay in haween intii hore ka badan ay haatan dooranayaan in ay cisbitaallada ku dhalaan, dhalmo joojiyena isticmaalaan, kuwaasina waa qaybo ka mid ah waxyaabaha hagaajiya caafimaadka hooyada. “Waa calaamad fiican oo muujinaysa in haddii aannu dedaallada sii kordhinno, ay markaa suuroggal tahay in aannu si weyn u yarayno dhimashada amaba aannuba gebigeedba tirtirro [dhimashada la xiriirta dhalmada hooyada],” ayay tiri marwo Kikwete, iyadoo intaa ku dartay in ay arrintani Tansaaniya ku hagaajin doonto gaaridda Himilada Horumareed ee Kun-sanaadlaha.

Kikwete ayaa qoysaska iyo bulshada rayidka ahba ku boorrisay in ay miisaaniyad gaar ah meel u dhigaan hooyooyinka aan weli dhalin, dawladdana waxay ugu baaqday in ay ka dhabayso ballan-qaadkeedii ahaa in ay kordhinayso tirada ardada haatan dhiganaysa macaahidda caafimaadka.