• 1 Faallo
• Daabac
• Email
• Tweet
• Dib u celi

Dawladda Federaalka KMG ah ee Soomaaliya ayaa Khamiistii (16-ka March) isla oggolaatay qorshe lagu dejinayo aagagga cusub ee laga xoreeyey gacan ku haynta al-Shabaab, xafiiska raysal wasaaraha ayaa sidaa ku sheegay war-murtiyeed ka soo baxay.

Wasiirrada iyo saraakiisha sarsare ayaa isku raacay in ay tahay in dawladdu ay si degdeg ah tallaabo u qaaddo oo ay buuxiso meelihii ay banneeysay al-Shabaab, iyadoo taa looga gol-leeyahay in nabadda loo cago dhigo, dib-u-heshiisiinta la dardar geliyo, markaana la dhiso maamulo maxalli ah oo shaqaynaya.

"Hannaanka DFKMG ahi wuxuu noqon doonaa mid ay cid waliba wax ku soo kordhin karto, oo dimuqraaddi ah oo lagana wada qayb-qaato,” ayay tiri oraahdu. “Hannaankani wuxuu ku salaysnaan doonaa dhaqankii hore ee Soomaalida ee dib-u-heshiisiinta iyo wadahadallada ku salaysnaa, waxaana loo jaangoyn doonaa in xaaladaha markaa meesha ka jira uu la jaanqaadi karayo.”

Muhiimadaha ay dawladdu diiradda saarayso waxaa ka mid ah talinta sharciga, xakamaynta hubka cululs, dib-u-dejinta qaxootiga, soo celinta qaybinta gargaarka bani’aadannimo iyo bixinta adeegyada asaasiga ah.

Dawaladda FKMG ahi waxay qabanqaabin doontaa shirar dib-u-heshiisiin ah oo lagu qaban doono aagagga la xoreeyey waxaanay isugu yeeri doontaa hoggaamiyeyaasha bulshada si ay uga wada hadlaan qaddiyadaha ay ka mid yihiin ammaanka iyo hub dhigista, iyo weliba qorshayaal ku aaddan doorashooyin maxalli ah, ayay tiri warbixintu .