• +hoos ku faallee
• Daabac
• Email
• Tweet
• Dib u celi

Muddada sharciga ah ee DFKMG ah ee Soomaaliya waxay ku eg tahay August 20-keeda, lamana sii kordhin doono ayuu Arbacadii (29-ka February) war-saxaafadeed ku sheegay Raysal wasaaraha Soomaaliya, Cabdiweli Maxamed Cali.

"Beesha caalamka iyo dadka Soomaaliyaba waa ay ka go’an tahay in la soo afjaro xilliga ku-meel-gaarnimada ah bisha August 2012-ka si ay Soomaaliya u samaysato dawlad cusub oo u adeegta dadkeeda. Qorshaha xaaladdaa kala-guurka ah waa diyaar waana tub khariidadeedka iyo Heshiisyada Garowe I iyo Garowe II,” ayuu yiri Cali, isagoo tixraacaya heshiisyadii ay sida wadajirka ah dhawaan hoggaamiyeyaasha Soomaaliyeed ugu gaareen in la sameeyo dawlad federaal ah oo dadka oo dhan metesha.

Heshiisyadii Garoowe ee November iyo February ayaa sharxaya mabaadii’da lagu sameeynayo dastuur iyo baarlamaan labo aqal ka kooban oo ay yeelan doonaan maamullada mustaqbalka. “Shirarka Garoowe waxay isu keeneen Soomaalida si ay jiho midaysan uga wada qaataan ansixinta dastuurka, iyo weliba in ay samaystaan baarlamaanka,” ayuu yiri Cali.

Cali wuxuu sidoo kale ammaanay horumarka laga gaaray dhinaca ammaanka, isagoo xusay xoraynta Muqdisho, Beledweyne, Baydhaba iyo aagag kale oo laga saaray al-Shabaabka, waxaanu intaa ku daray in “dawlad wanaagga” Soomaaliya uu soo jiitey dareenka caalamka.