• 5 Faallo
• Daabac
• Email
• Tweet
• Dib u celi

Odeyaasha dhaqanka Soomaalida ayaa todobaadkan ku kulmay Muqdisho si ay uga dhiidhiyaan fara-galinta ay madaxda sare ee dowladdu ku wadaan hanaanka soo xulidda baarlamaanka.

Odeyaasha ayaa dalbaday in siyaasiyiinta ay joojiyaan isku daygooda fara-galinta sharci-darada ah ee ku hayaan qofka ay u dooranayaan xubinimada baarlamanka, kaasoo la qorsheeyay in ay doortaan madaxweynaha dalka uu yeelan doono 20-ka August.

Waqtiyo dhowr ah oo loo qabtay in lasoo gudbiyo magacyada xubnaha baarlamaanka ayaa laga soo gudbay, iyadoo odeyaashu ay in badan ku cabanayaan in fara-galin siyaasadeed ay dib-u-dhigayso hanaanka soo xulidda.

Guddoomiyaha Gudiga Farsamo ee Soo Xulidda (TSC) Cabdulaahi Cusmaan ayaa Sabahi u sheegay Jimcihi (Agoosto 10-keedii) in odeyaashu ay goor horeba soo gudbiyeen 184 kamida 275-ta la doonayo, iyadoo kala xulidduna ay bilaaban doonto maalinta Sabtida ah.

184-ta ayaa noqon kara kooram buuxa ee baarlamaanka cusub ee Soomaaliya si ay usii bilaabaan waajibaadkooda sharciga ah.

TSC-da, oo shaqadoodu ay tahay in ay la socdaan soo xulidda xubnaha baarlamaanka cusb, ayaa dhowr jeer kordhiyay waqtiga kama dambaysta ah ee aqbaladada xubnaha.

"Qabaa'ilka qaarkood waxa ay liis ay ku qoranyihiin dadka u matalaya baarlamaanka u gudbiyeen TSC-da, laakiin qabaa'ilka kale wali ma aanay soo gudbin xubnahooda," ayuu odey dhaqameedka Cali Cabdiraxmaan u sheegay Sabahi.

Axmed Cabdi Caalin, oo ah odey dhaqameed kale, ayaa sheegay in odeyaashu ay saarantahay mas'uuliyad wadaniyadeed iyo mid diimeed si ay usoo xulaan xubnaha u qalma baarlamaanka. "Waxaa naloo igmaday in aan xulano xubno loo eegayo aqoontooda iyo shahaadooyinkooda, si markaa baarlamaanka uu awood ugu helo in uu dusha u rito mas'uuliyadooda wadaniyadeed iyo midda sharciyeed," ayuu yiri. "Ma aqbali karno in naloo tilmaamo musharixiinta."

Guddiga oo ku baaqaya in madax-banaani buuxda la siiyo odeyaasha dhaqanka

"Waxaa nasoo gaaray cabashooyin ah in qaar kamida siyaasiyiinta ay fara-galinayaan hanaanka soo xulidda," ayuu gudoomiyaha TSC Cabdulaahi Cusmaan u sheegay Sabahi. "Waxaannu ugu baaqaynaa siyaasiyiinta iyo dhamaan qaybaha kale ee ku lugta leh fara-galinta in ay joojiyaan dhaqamada noocaas ah iyo wax walba oo fara-galin ah, si hannaanka soo xulidda loogu oggolaado in uu qaato waddo sax ah, iyadoo aysan jirin fara-galin sharci-darro ah ama caqabado," ayuu yiri.

Cusmaan ayaa ugu baaqay siyaasiyiinta fara-galinta ku haya hannaanka soo xulidda in ay madax-banaani buuxda siiyaan odeyaasha "si aysan u wiiqin hanaanka soo xulidda, loona helo kalsoonida dadka Soomaaliyeed".

Waxa uu ka digay in fara galinta caynkan ah ay saamayn karto hufnaanta soo xulidda, ayna bilaabi karto khilaaf cusub oo ka dhex dhasha qabaa'ilka kala duwan ee Soomaalida.

Cusmaan ayaa sidoo kale odeyaasha dhaqanka ugu baaqay in ay la yimaadaan hufnaan iyo aaminaad heer sare ah marka ay wax xulayaan. "Marka aan dib u eegid ku sameeyno xubnaha baarlamaanka cusub, waxaannu joojin doonna doorashada xubin walba ee ku caddaato in ay ku lug laheyd laaluush si ay u hesho xubinnimada baarlamaanka, iyo kuwa aan raacin talaabooyinka sharciga ah ee la meel dhigay."

Heshiiskii lagu gaaray shirkii Garoowe ayaa tilmaamaya in xubnaha cusub ee baarlamaanka ay soo xulaan odeyaasha dhaqanka ee qabaa'ilka, iyadoon aysan fara-galin ku samaynaynin saxiixayaashii Khariiradda Nabadda ama siyaasiyiin kale oo leh hanka siyaasadeed.

Sameynta baarlamaanka cusub waxa uu tallaabo muhim ah u yahay qaybihii ugu dambeeyay ee jadwalka dhameynta xiliga kumeel-gaarnimada. Marka ay odeyaasha dhaqanka dhamaystiraan soo xulidda xubnaha baarlamaanka, sharci-dajiyayaasha lasoo xulay waxa ay dooran doonaan af-hayeen iyo labadiisa ku xigeen iyaga oo ugu dambayntana dooran doonaan madaxweyne.

Toban bari kaliya ayaa ka hartay in tallaabooyinka haray lagu dhameeyo waqtigii loogu talo galay.