• 5 Faallo
• Daabac
• Email
• Tweet
• Dib u celi

Wejiga koowaad ee mashruuca Waddada Tareenka ee Nairobi ayaa u socda sidii loogu talaggalay, waxaanu bilaabayaa qaadidda rakaabka bisha soo socota.

Mashruuca ayaa loola gol leeyahay in uu yareeyo saxmadda ka jirta magaalo-weynta Nairobi oo uu markaa debciyo galaangalka ay dadka basaska raaca u leeyihiin inta u dhexaysa Degmada Dhexe ee Ganacsiga iyo aafaha sare ee magaalada.

Mashruuca jidka tareenka ee ay ku baxayso 24-ka bilyan oo shilin o u dhiganta 283 milyan oo doolar ayaa waxaa loo kala qaybshay afar weji, oo isku xiraya Degmada Ganacsiga ee Bartamaha ah iyo Syokimau, Ngong, Kiserian Kikuyu iyo madaarka caalamiga ah ee Jomo Kenyatta, sida ay sheegtay Wasaaradda Gaadiidka ee Kenya.

Mashruuca ayaa waxaa ka mid ah dayactiridda waddooyinka tareen ee jira, hagaajinta saldhigyada tareennada, calaamadayn, qalabayno, soo iibin baabuur tareenno cusub, iyo ballaarinta adeegga tareenka lagu gaarsiinayo madaarka.

Wejiga koowaad ee mashruuca -- 2.2 kiiloomitir oo waddo ah, iskuna xiraysa Saldhigga Tareenka ee Syokimau iyo Saldhiggii hore ee Embakasi – ayaa la dhamaystiray May 30-keedii.

Jidka Syokimau- Degmada Dhexe ee Ganacsiga ayaa la rajeynayaa in uu billaabo hawlgallo ganacsi dhamaadka bisha July, waxaana ku kacday 200 oo milyan oo shilin oo u dhiganta 2.4 milyan oo doolar, iyadoo la rajaynayo marka mashruuca la dhameeyo in maalintiiba uu u adeego 10,000 oo rakaab ah.

Wasiirka Gaadiidka Amos Kimunya ayaa sheegay in Saldhigga Jidka Tareenka ee Syokimau uu wax badan ka tari doono in uu saxmadda ka saaro magaalada aanu hagaajin doono waaxda gaadiidka ee magaalada.

"Waxaannu xaqiijin doonnaa in ay jiraan xaddiga ugu badan ee tareenno ah ee si maalinle ah ugu hawlgalaya si ay u daboolaan dalabaadka dadweynaha,” ayuu yiri ka dib markii uu indha-indheeyey saldhigga bishii May, sida ay sheegtay The Star-ta Kenya ka soo baxda.

"Ma dhici doonto in aad saacado dhawr ah saxmad la nuuxsan weydo,” ayuu yiri.

Jidka Syokimau- Degmada Dhexe ee Ganacsiga ayaa ah jid-tareemeedkii ugu horreeyey ee Kenya laga dhiso ilaa iyo Dagaalkii Adduunka ee 2aad. Jid-tareemeedkii hore oo ay Ingiriisku dhiseen intii u dhexaysay 1896 iyo 1901 ayaa ka dhaqaaqa magaalada dekedda ah ee Mombaasa oo mara Kisumu oo ku taal hiriqa Victoria. Kordhintan cusubi waxay jidkii hore ku soo xiraysaa Saldhigga Tareenka ee Nairobi oo ku yaalla Degmada Dhexe ee Ganacsiga.

Dhismaha saddexda weji ee ka hartay jidka tareenka ayaa billaaban doona sanadka soo socda, agaasimaha maaraynta ee Shirkadda Jid-tareennada Kenya Nduva Muli ayaa warfidiyeenka u sheegay bishii hore, iyadoo uu markaa ku jiray safarkii xarig-jarka ee uu uga soo kicitimay Syokimau oo uu ugu socday caasimadda.

Dawladda ayaa ka fikiraysa in ay raadiso maal-gelin caalami ah si ay lacago ugu hesho inta ka hartay mashruuca jidka tareenka, ka dib markii lacag la qorsheeyey oo boon ahayd oo 17 bilyan oo shilin una dhiganta 200 milyan oo doolar ay shaqayn weydey.

Marka ugu horreeysa ee la dhmaystiro, ayaa dayactirka oo dhan wuxuu yeelan doonaa awood horu-dhac ah oo uu ku daabbulo 170,000 oo rakaab ah, sida ay qabto InfraCo Afrika, oo la shaqaynaysay Jid-tareennada Kenya ilaa iyo 2009-kii.

InfraCo ayaa sheegtay in mashruuca oo furi doono fursado cusub oo dhinaca shaqaynta iyo guryaynta ah, aanu isla markaa keeni doono daabbulid la isku hallayn karo oo loo sameeyo dadka magaalada deggan iyo kuwa soo booqanaya. Dadka meheradaha u safra ayaa si gaar ah uga faa’iidi doona adeegga degdegga ah ee aan istaagayn oo u dhexeeya gegida diyaaradaha iyo bartamaha magaalada.

Jidka tareen ee la dayac-tiray waa qayb ka mid ah qorshaha horumarinta ee Himilada Kenya ee 2030-ka, waxaa kale oo ay tahay qayb ka mid ah dedaallada joogtada ah ee ay dawladdu ku doonayso in ay hagaajiso gaadiidka dalka. Mashaariicda waaweyn ee cusub oo kaabayaasha ah waxaa ka mid ah jidka weyn ee casriga ah eeThika, jidka weyn ee Nairobi-Mombasa iyo ballaarinta madaarka caalamiga ah ee Jomo Kenyatta.

Casriyaynta caasimadda

Martin Gateri, oo ah injineer rayid ah, la-taliyena uga ah dhinaca mashaariicda kaabeyaasha shirkadaha gaarka loo leeyahay iyo dawladda ayaa sheegaya in mashaariicda jid-tareennadu ay casriyayn doonaan Nairobi, aanay u ekaysiin doonaan caasimadaha kale ee caalamiga ah oo ay gaadiidka xoojiyaan tareenno uu xawligoodu sarreeyo.

"Tani waa arrin aad u xasaasi ah, mar haddii ay ku micnoobayso in la debciyo saxmadda jidadka oo isla markaana loo hagaajiyo wacyiga guud ee kaabayaasha magaalada, iyadoo taa loo marayo soo kordhinta hab qiime jaban oo gaadiidka raaciddiisa ah oo la siiyo dadka dhaqsada u soo kordhaya ee magaalada,” ayuu Gateri ku yiri Sabahi.

In kastoo ay jireen walaacyo ku saabsan dadka laga eryey meelihii ay ku noolaayeen si looga dhiso jidad tareen oo cusub, haddana Gateri wuxuu sheegay in ay lagama maarmaan tahay in wax uu loo huro horumarrada.

"Dhismahii lagu sameeyey jid-treennada London 1880naadkii ayaa dalka furfuray salkana u dhigay casriyayntii bulshadaa,” ayuu yiri. Samaynta jid-tareen cusub oo dalka oo dhan mara ayaa ah mid ka mid ah tallaabooyinka Kenya looga dhigayo dal uu dakhligiisu dhexdhexaad yahay."

Dhaqaaleyahanka Tiberius Barasa ayaa sheegay in tareennada cusubi ay wax ka geysan doonaan sahlidda saxmadda magaalada, laakiin faa’iidooyinka dhaqaale aanay ahayn kuwo la hubo.

"Faa’iidada jidkani waa inuu sahli doono saxmadda jidadka waweyn ee magaalada soo galaa-baxa, iyo weliba yaraynta waqtiga ay dadku dhex fadhiyaan gaadiidkooda ay saxmaduhu xannibeen, ayuu yiri. “Ha yeeshee, dhaqaale ahaan, faa’iidadu waxay noqon doontaa mid aan sidaa u buurrayn, maadaama ay jidadku yihiin kuwo aad u gaaggaaban oo ka yar 30 kiiloomitir.”

Sida ay sheegayso Wasaaradda Gaadiidku, Saldhigga Jid-Tareenka ee Syokimau ee Nairobi wuxuu ahaan doonaa kan ugu dheer oo ah 20 kiiloomitir.

Si loo soo saaro arrin faa’iido dhaqaale oo la taaban karo, ayuu yiri Barasa, hababka jid-tareennada ayay tahay in ay gaaraan xaruumaha magaalooyinka aadka uga fog-fog caasimadda sida Eldoret, Nakuru iyo Machakos, si markaa loo sahlo daad-guraynta badeecooyinka loona kordhiyo ganacsiga.

Francis Gichuki, oo ah injiyeer dhinaca cilmiga deegaankaa ah, kana shaqeeya Jaamacadda Nairobi ayaa sheegay in jidadka cusubi ay keeni doonaan faa’iido yar oo dhinaca deegaanka ah.

Gichuki ayaa Sabahi u sheegay in tareennada ay Jid-tareennada Kenya isticmaali doonaan ay yihiin kuwo duqoobay oo deegaanka ugu fiicnayn sida tareennada cusub ee haatan suuqa yaalla. Si kastaba ha ahaatee, wuxuu yiri saamaynta uu tareen duq ahi deegaanka ku yeesho ayaa weli ka yar tan ay baabuurtu ku yeeshaan.

Mashruucu wuxuu aad u sii guulaysan karaa haddii ay dalka u suuroggasho in uu tareennada ku xiro matoorro cusub oo uu qaacoodu yar yahay. Wuxuu sheegay in ay taasi Kenya ka caawin doonto in ay deegaan ahaan horumarto, maadaama hab tareeneed nadiif ah oo wacan uu lagama maarmaan u yahay yaraynta gaaska iyo shidaalka la isticmaalo.